‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา คนฺธปูชโก เถโร อิมา คาถาโย
อภาสิตฺถาติฯ
คนฺธปูชกตฺเถรสฺสาปทานํ ทสมํฯ
ชคติทายกวคฺโค ฉจตฺตาลีสโมฯ
ตสฺสุทฺทานํ –
ชคตี โมรหตฺถี จ, อาสนี อุกฺกธารโก;
อกฺกมิ วนโกรณฺฑิ, ฉตฺตโท ชาติปูชโกฯ
ปฏฺฏิปุปฺผี จ โย เถโร, ทสโม คนฺธปูชโก;
สตฺตสฏฺฐิ จ คาถาโย, คณิตาโย วิภาวิภิฯ
47. สาลกุสุมิยวคฺโค
1. สาลกุสุมิยตฺเถรอปทานํ
[1]
‘‘ปรินิพฺพุเต ภควติ, ชลชุตฺตมนามเก;
อาโรปิตมฺหิ จิตเก, สาลปุปฺผมปูชยิํฯ
[2]
‘‘สตสหสฺสิโต กปฺเป, ยํ ปุปฺผมภิโรปยิํ [ปุปฺผมภิปุชยิํ (สฺยา.)];
ทุคฺคติํ นาภิชานามิ, จิตปูชายิทํ [พุทฺธปูชายิทํ (สฺยา.)] ผลํฯ
[3]
‘‘กิเลสา ฌาปิตา มยฺหํ, ภวา สพฺเพ สมูหตา;
นาโคว พนฺธนํ เฉตฺวา, วิหรามิ อนาสโวฯ
[4]
‘‘สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา สาลกุสุมิโย เถโร อิมา คาถาโย
อภาสิตฺถาติฯ
สาลกุสุมิยตฺเถรสฺสาปทานํ ปฐมํฯ
2. จิตกปูชกตฺเถรอปทานํ
[6]
‘‘ฌายมานสฺส ภควโต, สิขิโน โลกพนฺธุโน;
อฏฺฐ จมฺปกปุปฺผานิ, จิตกํ อภิโรปยิํฯ
[7]
‘‘เอกติํเส อิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, จิตปูชายิทํ ผลํฯ
[8]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[9]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[10]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ